Դիլիջանի պատմամշակութային մարգարիտներից է Ջուխտակ վանքը, որն առանձնանում է իր գեղեցկությամբ։ Հիմնվել է 12-րդ դարում։ Գտնվում է Դիլիջանից 3 կմ հյուսիս-արևելք։
Կազմված է երկու եկեղեցիներից՝ Սուրբ Գրիգոր և Սուրբ Աստվածածին։ Ջուխտակ անվանումը կապված է երկու եկեղեցիների հետ. ջուխտ նշանակում է երկու։ Եկեղեցիների պատերին կան արձանագրություններ, որոնցում հիշատակվում են նաև Պետրոսի վանք և Գիշերավանք անվանումները։
Երկու եկեղեցիների շուրջ տարածված է յուրահատուկ տապանաքարերով միջնադարյան գերեզմանոցը, որը բավականին միստիկ մթնոլորտ է ստեղծում։
Եկեղեցիներն այժմ գտնվում են կիսավեր վիճակում։ 1973-77 թվականներին Պատմական հուշարձանների պահպանման հայկական ընկերության կողմից վանքային համալիրում որոշակի շինարարական աշխատանքներ են կատարվել: Գերեզմանոցի տապանաքարերը խիստ անմխիթար վիճակում են։
Չնայած իր կիսավեր տեսքին, Ջուխտակ վանքն էլ ավելի է գրավում մարդկանց՝ իր խորհրդավորությամբ։ Նրա տեսքը մատնում է իր հազարամյա տարիքը:
*Տեքստը պատկանում է Կուպոն.հայ-ին: Հոդվածն ամբողջական կամ մասնակի արտատպելիս` սույն էջին ակտիվ հղվելը պարտադիր է: